خاص لتلاميذ البكالوريا!!

خاص لتلاميذ البكالوريا!!

  • الخميس ١٨ يونيو ٢٠٢٠ - ١:٢٨ م
  • 441
الهدف مالمقال هذا هو التسهيل قد ما نقدرو باش تلامذتنا إلي باش يعدوا الامتحانات يلقاو في بلاصة واحدة كل ما يلزمهم للتحضير والمراجعة. فحظ طيب للجميع 

 

 
أما قبل كل شي ما فيها باس كان نعرفو أكثر على تاريخ البكالوريا:

 

 
أوّل تاريخ للبكالوريا في العالم يرجع لعام 1808 في فرانسا وقت ما أصدر الإمبراطور "نابليون بونابرت" أمر يتعلّق بتنظيم الشهادة هذه واعتبارها "رتبة علمية". أمّا في تونس، أوّل امتحان البكالوريا صار في عام 1891 يعني 10 سنين بعد دخول الاستعمار الفرنسي وتواصل حتى لعام 1956 وكان وقتها التلامذة إلى يعديو الامتحان يتعدوا عالصوابع مثال ما بين 1891 و1918 ما نجحوا كان 123 تلميذ وفي عام 1927 27 تلميذ وفي عام 1938، نجحوا 58.

 

 
والتاريخ سجل في عام 1924 في معهد كارنو (إلى ولا يتسمى من 1983 المعهد النموذجي الحبيب بورقيبة)، نجاح تلميذ أسمو الحبيب بن علي بورقيبة في شعبة البكالوريا فلسفة بمعدل 16 من عشرين وإلى ولا بعد أوّل رئيس للجمهورية التونسية وكان من بين التلامذة إلى قراو معاه وقتها: الطاهر صفر والبحري قيقة.
نهار 31 ماي 1957 صار أوّل امتحان لشهادة البكالوريا تونسي تونسي شارك فيه 1900 مترشح منهم 1400 من ولاية تونس وحدها والبقية موزّعين على بقيّة الولايات و وصلت نسبة النجاح 30 بالمائة يعني حوالي 600 تلميذ تحصلوا على الشهادة ومنهم 50 بملاحظة "حسن جدا". وكانت الامتحانات تصير على دورتين أو ما كان يسمى بالجزء الأوّل في نهاية السنة الخامسة من التعليم الثانوي والجزء الثاني في نهاية السنة السادسة من التعليم الثانوي، والناجحين فالاختبارات الكتابية يعديو اختبارات شفاهية في جميع المواد العلمية والأدبية. وعلى إثر التمديد في مسلك التعليم الثانوي من 6 إلى 7 سنوات ولات البكالوريا تصير في نسخة واحدة وكيما العادة، الناجحين في الكتابي يعديو الإختبارات الشفاهية إلي تصير في ثلاثة مراكز كبرى بتونس و سوسة وصفاقس و من بعد تنحى الشفاهي عام 1976 وتوحدت الشهادة بعد ما كانت مقسمة إلى بكالوريا فرنسية و بكالوريا عربية.
برشة تعديلات صارت على امتحان البكالوريا :
أولاً، بعد ما كانت تصير في دورتين الأولى في شهر جوان والثانية في شهر سبتمبر، تمّ تعويض الدورة الثانية بدورة تدارك تصير اختباراتها أيّام قليلة بعد إعلان نتائج الدورة الأولى ويختبر المترشّحون أساسا في المواد إلى ما تحصلوش فيها على المعدّل.
ثانيا، تنوّعت اختصاصات البكالوريا وولات 7 اختصاصات: رياضيات، علوم تجريبية، تكنولوجيا، اقتصاد، إعلامية، آداب ورياضة.
ثالثاً، في عام 2002 صدر قانون احتساب نسبة 25 بالمائة من المعدّلات السنوية للمترشّحين الشى إلي خلا، حسب عديد المختصين، نسبة النجاح تزيد وقيمة الشهادة تنقص حتى أنّو بعض الدول ولات تفرض تقييم إضافي للتلميذ التونسي قبل ما يرسم فالجامعة.
تطوّرت نسب النجاح في امتحان البكالوريا إلى حدّ أنّها فاتت في بعض السنوات 70 بالمائة. وكان للفتيات ديما النصيب الأكبر سواء في نسبة النجاح وإلا عدد المتفوّقين وللتذكير فان سنة 2010 شهدت ولأوّل مرة في تاريخ البكالوريا التونسية حصول فتاة من المعهد النموذجي بأريانة على معدل 20 من 20 و هو رقم قياسي.
وكانت النتائج تخرج فلجرايد اليومية و في الإذاعة الوطنية و في مراكز الامتحان ومن بعد جات التكنولوجيا ( الإرساليات القصيرة والانترنت) بش تعوض الطرق التقليدية التي كانت تضفي نكهة خاصة على عمليّة الإعلان على النتائج.
وللتذكير فإنّ النظام التربوي التونسي شهد ثلاثة إصلاحات كبرى الأوّل كان على يد المرحوم محمود المسعدي توّج بقانون 4 نوفمبر 1958 و الثاني على يد المرحوم محمد الشرفي من خلال قانون جويلية 1991 و الثالث كان مع منصر الرويسي في جويلية 2002.

 
بعد ما خذينا فكرة على تاريخ البكالوريا باش نعطيكم أهم خمسة مواقع تنجموا تلقاو فيهم كل ما تستحقوه للمراجعة والتحضير 

 

موقع bacweb.tn 

الموقع الرسمي لوزارة التربية والتعليم تلقاو فيه المواضيع  من 1994 حتى 2019 مع الاصلاح 

رابط الموقع :

 

 

موقع devoir.tn 

موقع شامل موجود فيه كل ما تستحقوه للتحضير من دروس، تمارين، إختبارات، إلخ....

رابط الموقع :

 

موقع exabac.com

 

موقع متخصص في مواضيع ودروس البكالوريا 

رابط الموقع :

 

موقع mon-bac.net

موقع متخصص في مواضيع ودروس البكالوريا 

رابط الموقع :

 

موقع devoirat.net

موقع شامل موجود فيه كل ما تستحقوه للتحضير من دروس، تمارين، إختبارات، إلخ....

رابط الموقع :